बैतडी — प्रधानमन्त्री बालेन्द्र शाहको आसन्न भारत भ्रमणका क्रममा बैतडीको झुलाघाटस्थित महाकाली नदीमा मोटरेबल पुल निर्माणको विषयलाई प्राथमिकताका साथ उठाइदिन आग्रह गरिएको छ ।
झुलाघाटमा मोटरेबल पुल निर्माणको माग गर्दै लामो समयदेखि अभियान सञ्चालन गर्दै आएका अभियानका संयोजक एवं बैतडी उद्योग वाणिज्य संघका अध्यक्ष नरबहादुर चन्दले प्रधानमन्त्री शाहलाई भारत भ्रमणका क्रममा उक्त विषय ठोस रूपमा उठाउन आग्रह गरेका हुन् ।
पुल निर्माणका विषयमा यसअघि नेपाल र भारतबीच विभिन्न समयमा सहमति तथा घोषणा भए पनि कार्यान्वयन हुन नसकेको भन्दै चन्दले यसपटकको भ्रमणमा विषयलाई उच्च प्राथमिकता दिनुपर्ने बताए ।
दार्चुलामा महाकाली नदीमाथि मोटरेबल तथा झोलुंगे पुल निर्माण भइसक्दा पनि बैतडीको झुलाघाटमा मोटरेबल पुल बन्न नसक्नुको कारणबारे भारतीय पक्षसँग जवाफ माग्नुपर्ने उनको भनाइ छ ।
निर्वाचनको समयमा पूर्वप्रधानमन्त्रीहरू शेरबहादुर देउवा, केपी शर्मा ओली, पुष्पकमल दाहाल र बाबुराम भट्टराईले समेत आफूहरूको नेतृत्वमा सरकार बने झुलाघाटमा मोटरेबल पुल निर्माण गर्ने सार्वजनिक प्रतिबद्धता जनाएका थिए । तर, उनीहरू सबैले सरकारको नेतृत्व गर्ने अवसर पाए पनि पुल निर्माणको प्रक्रिया अघि बढ्न सकेको छैन ।
२०७९ जेठ १९ गते तत्कालीन प्रधानमन्त्री पुष्पकमल दाहाल र भारतीय प्रधानमन्त्री नरेन्द्र मोदीले झुलाघाट र डडेल्धुराको शीर्ष क्षेत्रमा मोटरेबल पुल निर्माण गर्ने घोषणा गरेका थिए । त्यसपछि २०८० वैशाख ६ र ७ गते भारतीय प्राविधिक टोलीले झुलाघाट क्षेत्रमा सम्भावित निर्माणस्थलको निरीक्षण गरेको थियो ।
नेपालतर्फ बैतडीको मौराभिर र सालघारी तथा भारततर्फ पिथौरागढको झुलाघाटस्थित सशस्त्र सीमा बल (एसएसबी) क्याम्प आसपासको क्षेत्रलाई सम्भावित निर्माणस्थलका रूपमा हेरिएको थियो । प्रारम्भिक अध्ययनपछि करिब पाँच सय मिटर लामो पुल निर्माण गर्ने गरी विस्तृत परियोजना प्रतिवेदन (डीपीआर) समेत तयार पारेर भारतीय सरकारलाई बुझाइएको थियो । तर, त्यसयता पुल निर्माणसम्बन्धी थप प्रक्रिया अघि बढ्न सकेको छैन ।
हाल बैतडीवासी अंग्रेज शासनकालमा निर्माण गरिएको जीर्ण झोलुंगे पुलको प्रयोग गरेर महाकाली नदी वारपार गर्न बाध्य छन् । झुलाघाटमा मोटरेबल पुल निर्माण भए बैतडीसहित समग्र सुदूरपश्चिमको आर्थिक, सामाजिक तथा पूर्वाधार विकासमा टेवा पुग्ने अपेक्षा गरिएको छ ।
प्रधानमन्त्री शाहको भारत भ्रमण यही मंसिर ६ गते (नोभेम्बर २२ तारिक) हुने तयारी छ । भ्रमणका क्रममा दुई देशबीचको सम्पर्क सञ्जाल विस्तार, विकास सहायता तथा पूर्वाधारका विषयलाई प्राथमिकता दिने तयारी रहेको सार्वजनिक विवरणमा उल्लेख छ ।
भ्रमणका क्रममा झुलाघाट पुल निर्माणका लागि यसअघि भएका सहमति, अध्ययन र डीपीआरको अवस्थाबारे भारतीय पक्षसँग जानकारी लिएर निर्माण प्रक्रिया अघि बढाउन पहल गर्नुपर्ने अध्यक्ष चन्दले बताए । प्रधानमन्त्रीले यस विषयमा चासो राखे पुल निर्माणको प्रक्रिया अघि बढ्न सक्ने उनको विश्वास छ । कान्तिपुर सभार










