बैतडी । २१ जेठ- बैतडीको दशरथचन्द नगरपालिका-७ लाई पूर्णखोप सुनिश्चित वडा घोषणा गरिएको छ । नगरपालिकाभित्रका वडाहरुलाई पूर्णखोप सुनिश्चित वडा घोषणा गर्ने अभियान अन्तरगत बुधबार एक कार्यक्रमको आयोजना गर्दै वडालाई पूर्णखोप सुनिश्चित वडा घोषणा गरिएको वडा अध्यक्ष हरिदत्त बडुले बताउनुभयो ।
वडाभित्र रहेका खोप पाउनुपर्ने ५ बर्षमुनिका बालबालिकाहरुले राष्ट्रिय खोप तालिका अनुसार सबै खोप पाइसकेको एकीन भएपछि वडालाई पूर्णखोप सुनिश्चित वडा घोषणा गरिएको हो । नगरपालिकाका ११ ओटै वडालाई पूर्णखोप सुनिश्चित वडा घोषणापछि नगरपालिकालाई पनि पूर्णखोप सुनिश्चित नगरपालिका घोषणा गर्ने तयारी रहेको दशरथचन्द नगरपालिकाका स्वास्थ्य शाखा प्रमुख भुवनप्रसाद जोशीले बताउनुभयो।
हरेक बालबालिकाहरुले राष्ट्रिय खोप तालिका अनुसार खोप पाएको एकीन गरेपछि हरेक बर्ष वडा र पालिकालाई पूर्णखोप घोषणा गर्ने गरिएको जोशीले बताउनुभयो। बालबालिकाहरुलाई विभिन्न १३ ओटा रोगविरुद्ध खोप दिने गरिएको छ । ती खोपहरु पाएरनपाएको एकीन गर्न घरधुरी सर्वेक्षण गर्ने गरिएको र त्यसपछि पूर्णखोप सुनिश्चित वडा घोषणा गर्ने गरिएको जोशीले बताउनुभयो।
दशरथचन्द नगरपालिका-७ का वडा अध्यक्ष हरिदत्त बडुको अध्यक्षतामा भएको पूर्णखोप सुनिश्चित वडा घोषणा कार्यक्रममा दशरथचन्द नगरपालिकाका उपप्रमुख कौशिला चन्द प्रमुख अतिथी रहनुभएको थियो ।
कार्यक्रममा बोल्दै उपप्रमुख कौशिला चन्दले हरेब बालबालिकाले खोप बाट छुट्नु नहुने कुरामा जोड दिनुभयो । खोप पाउनु हरेक बालबालिकाहरुको नैसर्गिक अधिकार भएकाले पूर्णखोप सुनिश्चित घोषणा गर्नु आवश्यक रहेको बताउनुभयो। खोप कार्यक्रमले बालमृत्यु रोकथाममा ठूलो सहयोग पुर्याएको उहाँले बताउनुभयो । सोहि अवसरमा उपप्रमुख चन्दले नगर उपप्रमुखको कोसेली समेत वितरण गरेका थिए ।
दशरथचन्द नगरपालिकाका ११ ओटा वडामध्ये वडा नं १, २, ३ ४, ५, ७, ८, ९, १० र ११ लाई पूर्णखोप सुनिश्चित वडा घोषणा गरिसकिएको स्वास्थ्य शाखा प्रमुख जोशीले बताउनुभयो ।
