बैतडी- नेपाल भारत सिमानाका जुलाघाटबाट लागु औषध (खैरो हेरोइन) सहित एक जनालाई शनिबार प्रहरीले पक्राउ गरेको छ । नेपाल प्रहरी र सशस्त्र प्रहरीको संयुक्त टोलिले नाका आवत जावत गर्ने व्यक्तिहरुलाई चेकजाँच गर्ने क्रममा भारतबाट नेपालतर्फ आइरहेका दशरथचन्द नगरपालिका- ५ का २२ वर्षीय बिरेन्द्र रावललाई पक्राउ गरेको जिल्ला प्रहरी कार्यालय बैतडीका प्रवक्ता इन्सपेक्टर खेमविक्रम केसीले बताउनुभयो ।
रावलले कागजमा बेरी मुखभित्र लुकाई छिपाई राखेर ल्याउदै गरेको अवस्थामा २ सय मिलिग्राम लागु औषध (खैरो हेरोइन) बरामद गरेको उहाँले बताउनुभयो । रावललाई नियन्त्रणमा लिई थप अनुसन्धानको लागि जिल्ला प्रहरी कार्यालय बैतडीमा राखिएको प्रहरीले जनाएको छ । पछिल्लो समय बैतडी प्रहरीले लागु औषध कारोबारी र सेवनकर्ताहरुलाई उच्च निगरानी गरिरहेको छ ।
