बैतडी– बैतडीमा कोदालोले हानेर श्रीमतीको हत्या गर्ने श्रीमान कारागार चलान भएका छन् ।
श्रीमतीको हत्या गर्ने ६३ वर्षीय कृष्ण धामी कारागार चलान भएका हुन् ।
धामीले चैत्र ८ गते कोदालोले हिर्काएर आफ्नै श्रीमतीको हत्या गरेका थिए। जिल्ला अदालतले उनलाई आज (आइतवार) पुर्पक्षका लागि कारागार चलान गरेको जिल्ला प्रहरी कार्यालय बैतडीका निमित्त प्रमुख प्रहरी निरीक्षक नन्दराज जोशीले बताउनुभयो ।
चैत्र ८ गते बिहान धामीले कोदालोले हिर्काएर आफ्नै श्रीमती ५६ वर्षीया पार्वती धामी,उनकै घरमा डेरा गरेर बसेका डिलाशैनी गाउँपालिकाका कर्मचारी सुबास कलौनी र देवराज भट्टमाथि पनि आक्रमण गरेका थिए । उनकी श्रीमतीको उपचारको क्रममा सोहि दिन मृत्यु भएको थियो ।
आक्रमणबाट घाइते भएका कलौनी उपचारपछि डिस्चार्ज भइसकेका छन् भने भट्टको नेपालगञ्ज नर्सिङ होममा उपचार भइरहेको छ ।
